2025: E doote Danz

Stärbe, jä stärbe – mir wäre mol stärbe

Äsche zu Äsche und Ärde zu Ärde

Jungi und Alti, ob arm oder ryych

Gsundi und Granggi – em Dood isch es glyych

 

Är nimmt di zer Hand und bittet zem Danz

E letscht mol ins Liecht, denn nimmt är di Glanz

Jä jetz oder nie, du kasch nomol schtraale

Vor Predigerkirch‘ zum Minschter duur d Spaale

 

Es isch beleggd – sogar histoorisch

Jä dass dr Dood e Lääbens-Gfoor isch

Me het ihn gmoolt als Danz uf Helge

Will Mensche gärn im Jeensytts schwelge

 

E Dootedanz, e Dootedanz

Jä Basel bruucht e Dootedanz

E Bild, en Ort und um e Hoor

Dä Gross-Aaloss vom letschte Joor

 

Dr «Dootedanz zu Basel» als Freyluft-Speggtakel

Mit Drummle, Orcheschter – jä das maint s Orakel

Mit Schtimme wo singe – sogar mit Ballett

Und s Mischter als Biihni – e waansinns Parkett

So wurdi die Saga zem Lääbe erweggd

Dass Basel das Drama so wiider entdeggd

 

Vor lutter Fraid het gar kaine tscheggd

Dass Speggtakel elai halt d Keschte nid deggd

Für Byylljee will schyyns kaine zaale

E Requiem mit Hölle-Quaale

 

So kunnts wies kunnt, wenn Kunscht halt koschted

Jä d Biihni glänzt, doch s Baugrischt roschted

Me schwitzt und schwaisst bis‘ nimmi goot

Dä Danz zu Basel – är isch doot

 

Vyyl Zyt und au Liebi het me yynegschteggt

Doch laider ischs denne halt glyych abverreggt

Die ganze Proobe – drum laider fir d Katz

E Friedhof ischs worde – jä dr Minschter-Platz

Wär mit dr Sänse so fräch halt will danze

Dä leggts drum au mängmol glatt uff dr Ranze

 

Kai Dootedanz als Freyluft-Schau

Jä hinterhär isch jeede schlau

E doote Danz – das duet ys laid

Drum fyyre mir dä jetz grad zlaid

Als Doote-Zug mit Danz und mit Spiil

Voll Farb und voll Fraid – in unsrem Stiil

Will wo, wenn nid do an unsrer Faasnacht

Wird us däre Druur e son e Spass gmacht?!

 

Dr Doot entschpricht hitt nid em Zytgaischt

Drum hett me sich uff s Lääbe yygflaischt

Salaat und Grientee, achtsaam lääbe

Allewyl zem Beschte strääbe

 

Gsund ässe – und mässe – und nur optimiere

So kasch au mol rasch die Zyt do verliere

Die Zyt zem Syy, die Zyt firs Jetze

Statt immer Richtig Zuekunft hetze

 

Fascht alli verkinde, sy sin ooni Sinde

Mit Yoga statt Sofa iir Glyychgwicht am finde

Jä Laschter verschwinde und alli sinn seelig

Doch s Lääbe isch ändligg und s Jeensyts isch eewig

 

Mir sin hundert-zwanzig, doch gseen uss wie achzig

Kai Falte im Alter, derfiir voller Blaschtigg

Au gaischtig bereit sii fir jedi Belaschtigg

So fit und elastisch dangg täglig Gymnastigg

 

Mr gniesse s Lääbe voll und ganz

Doch blybts halt glyych e Dootedanz

 

Vom Danz zem Dood, so wills dr Zyklus

So lang wies goot machsch mit im Rhythmus

Und wenns zer Faasnacht vieri schloot

Denn fyyr das Lääbe vor em Doot

 

YOLO!