2023: TrennDii – vo Trends und Trennige

Wenn alli e Trend kenne 
Und panisch zem Trend renne 
Denn kasch das nimm Trend nenne 
Und sottsch di vom Trend trenne 

Jä s Lääbe vo hitte isch voll vo Probleem 
Mir pändle vom ainte ins andren Extreem 
Mir wänn nyt verbasse, s isch alles so scheen
Und hasse dä Schtress, jä s isch schizofreen
Mir jaage die Trends und maine si z kenne
Und hänn mr si denne, wänn mr ys trenne
Vo Gnuss und Iiberfluss zu Fruscht und Iiberdruss
S wird alles bitz z vyyl, dr totaali Iiberschuss
Di Vita e Parcours, mol uffe mol aabe
Mol Schaisse, mol Gold, aber immer am graabe
Drum trenn di jetz schnäll – und loos nid ufs Gschrey
Es goot jo au ooni – kumm sig doch so frey

Dr Trend maint: Machsch mit? Kasch sälber di syy
Waisch nid wär du bisch, bisch du nid derbyy
Bisch Bängger? Bisch Pungg? Gsund oder grangg?
Jä fiihlsch di als Schtuel oder als Bangg?
Worum zaigsch kai Dangg? Was isch denn di Zyyl?
Hei, all die Opzioone, das alles isch z vyyl!

Do hilft numme ains: Fortschritt und Technigg
Dausigi Gräätli und alli sin seehr schigg
Mir bätte si aa als wäre si Gott
Und paar Meenet speeter do sinn si scho Schrott
Es duurt nid so lang vo trendy zer Trennig
Ney isch halt besser, do hänn mr kai Hemmig
E Trennig befreyt, s isch meer als e Cliché
Wie d Kim vom Kanye, d Shakira vom Piqué

Jä s Lääbe isch e wilde Ritt
Mir sammle Gwicht mit jeedem Schritt
Und mängmool haissts: friss was es gitt
Kai Wunder bruuchts au mol e Schnitt
Kai Flaisch, kai Zugger und kai Wyy
Es deerf halt joo nid luschtvoll syy
Und wenn di denn vom Lääbe trennsch
Machschs immerhin als gsunde Mensch
So kasch d Orgaan no wyttergää
An ebber wo si gärn wurd nää
Di Keerper dient denn als Resäärve
Di Härz, di Niere und au d Näärve
Die finde sicher als Ersatz
E scheene neye Spände-Blatz
So läbsch no wytter, vyyli Joor
Als Gaischt us Flaisch – mit Hutt und Hoor!

Di Naase kriegt dr Odermatt (dr Karli)
Au d Lääbere fänd är no glatt (s isch klar gsi)
Und s Hiirni findet, s wär nid dumm
Im Roothuus bald e Vakuumm
Di Bruscht, falls die no niemer hätt
Die fänd d Adela sicher nätt
Denn hätt si nimm so schwäärs Gepägg
Dr Trend goht schyyns vom Blastigg wägg
Di Schnuure kunnt an Äscheblatz
Denn schafft au d BaZ e graade Satz

Trenn di vom Keerper – di Seel isch im Netz
Wo wytter kasch lääbe, fascht ooni Gsetz
Im wältwyyte Web do machsch was de willsch
Wenn clever verschteggt im Date-Pool chillsch

Jä virtuell isch virtuos
Und digitaal isch ideaal
Dr Bryys wo zaahlsch isch nid so gross
Me kennt au saage minimaal
Doch ai Hoogge hett die Gschicht
Au im Netz gits s jüngschte Gricht
Wenns irgendwenn kai Stroom me hett
Landsch trotzdäm uf em Stärbebett
Di Gaischt fluecht drum: hätt ych das g’aahnt
Hätt ych mi Spaicher besser blaant
Jä bi däm Trend, ych hätt kai Mieh
Und wurd sofort dr Stegger zieh

Me trennt sich hitt nid nur vom Keerper
Jä bisch im Trend myydsch beesi Weerter
Doch ych bi zu däm nid berait
Ha immer scho gärn Ziiri gsait
Dr aint dä isch woke und au no sensibel
Dr ander dä gseeht das nid so penibel
Dr aint macht flyssig Gender-Stäärn
Dr ander het das nid so gäärn
Fir baidi ischs e Froog vom Gschpyyr
Jä wär hett rächt – und wär leggt Fyyr?

Wär analog an d Fasnacht goot
Hett allewyyl dr richtig Droot
Glyych ob im Trend oder frisch trennt
Ych kenn e Fyyr wo immer brennt
Und es isch haisser als me das maint
Will es isch d Fasnacht won ys veraint
Im Schritt mit dr Cliq, wenn s Fieber uns paggt
Goohts zämme durch d Stadt und zämme im Taggt