2022: Mir löhn d’Sau uuse

Syt zwai Joor duesch dii gscheit verhalte 
Mee schlächt als rächt kasch di entfalte 
Dr ganz Daag loosch nur d Rue loo walte 
Die ganz Zyt alles dunde bhalte 
Die eewig Zyt am iberbrugge 
Was uffe kunnt am unterdrugge 
Voor säll und jeenem di am dugge 
Und au gaar vyyl am aabeschlugge 

Hesch au vo gar nyt welle wisse
Und fielsch di um dy Läbe bschisse
Grad dääglig hesch di zämmegrisse
Nur uff em Topf deheim no gschisse
Was sunscht miesst wägg nüm uusegloo
Dii gottvergässe zämme gnoo
Nid ai Momänt di mool lo goo
Scho lang bisch nüm in d Iebig koo

Dief unde hesch du sii versteggt
Melancholie het sii bedeggt
Dört lyydet si, isch fascht verreggt
Doch halt – jetz hesch si nei entdeggt
Noo lang zwai Joor isch s sowyt
S isch ändlig wiider iiri Zyt
Si het e grossen Appetyt
Und mues drum sofort unter d Lyt

So loss di jetze ändlig mache
In Wirggligkait wottsch s du doch au
Iir alli – Kailer oder Bache
Leend sii jetz uuse – die aarm Sau
Ab jetzt wird wiider grunzt vor Lache
Drum stelled eich grad zlaid zer Schau
Mit Schnaps statt Stääbli in dym Rache
Mir sehn nüm schwarz – mir sin jetz blau

Hit kunnt si zrugg in s Keenigryych
Kasch s nid verstoo und kasch s nid fasse
Es isch dr wirgglig schysseglyych
Ob s denn au wirgglig no duet basse
Unseri Häärze sin gar ryych
Dä Ryychtum wän mir jetz verprasse
Mir leen s jetz uuse, s winde Vyych
Und schnappe is die näggscht Haarasse

Drum vorwärts in die näggscht Spelungge
Duur d Gasse knallt dr Drummelhall
Ab jetz nur Wartegg-Pic und Schungge
Denn dä Wääg gsteerggt blybsch au am Ball
Mir wäärden iib’rall duuregwungge
Dy Rotte drei Daag iiberall
S wird pfiffe, gruesst und gesellig drungge
Die Stadt isch unser Sauestall