Zeedel Archiv

onYva – Fas-nicht 2021

Uf aimol heersch dr Wegger schälle.
Druff zwai Hind wo grad lutt bälle.
Schnäll s Goschdyym schnabbe, Laarve pagge.
Zum Abschiid non e Schmutz uf d Bagge.
Ab in d Stadt, dr Wäg isch wyt.
Längts äggschd das Joor mit dr Zyt?
Bim Barfi wärde d Schrittli schnäller.
S länggd gwiss nimm fir e Bier im Käller.
Dr Wäg zur Haseburg isch gfunde.
S duurt numme no e baar Sekunde.
Zem Pfäffergässli längd no d Kraft.
Das Joor hänn mr s pingdligg gschaffd.
Dr Vieri-Schlaag heersch grad no knabb.
Doch laider löscht denn s Liecht nid ab.
Kai Lärm, kai Clique wytt und brait.
Hett das em Andi niemer gsait?!

Will si e Virus gfange hett.
Blybd d Frau Fasnacht drum im Bett.
Scheene Saich, es schdinggd ys schuurig.
Sogar dr Fierz isch e bitz druurig.
S isch halb so wild wills isch wies isch.
Solang in unsrer Clique bisch.

Doch jo kai Mitlaid, s duet nütt nutze.
Schyssdrägg wägg wie Fuudi butze.
Au wenn sich Wehmuet zuen ys gsellt.
Die näggschd Fasnacht isch das wo zellt.

Mach d Auge zue und schdell dr voor.
Wenn uns öbben im ne Joor.
Die Stadt wieder zu Fiesse liggd.
Und ys dä Virus nimmi f… kniggd.
Und wies die Fraid wos in ys schtaut.
Uf ai Glapf denne usehaut.

Drääne fliesse, s Bier no meeh.
Hai das gitt e Wiederseeh!
Freudeschrey vertryybe d Gaischter.
Als wäri Basel wieder Maischter.

Es rötzt so lutt, das isch denn gschteert.
Dass es sogar dr Vordraab heert.
Dr Mats isch ändligg widr Pfau.
Und schtellt si Schtägge stolz zer Schau.

Au vo de Tambis heersch kai Gschtöhn.
Sälbscht sii finde jetz s Pfyffe schön.
Schtäggelambbe, haiaiai…
Draihd jeede Vordrääbler grad zwai.

Die Bilder, hoff y, hälfe do.
Die näggschde Daag guet z iiberstoh.
Denn trotz däm ganze Kääfer-Gschiss.
Die näggschd Fasnacht, jä die kunnt gwiss.
Masgge wägg und Laarven aa.
D Frau Fasnacht kunnt – mit onYva.

onYva – Bitz Irr Witz

Dr Joker isch en Allzwäggwaffe
Wo Guets und Beeses ka erschaffe
Är grinst au wenns nyt z’lache git
Vyyl schnalles nit und lache mit
Genie und Waan sinn gueti Frinde
Kasch s ainte als im andre finde
Jä lueg doch mol dr Joker aa
Dä schuurig druurig Straalemaa
Är grinst zwoor iiber baidi Oore
Doch wirggt drbyy e bitz vrloore
Dä drischti Gloon – was macht är do?
Jä hyylt er scho – jä lacht är no?
Är kennt jo mit ys Fasnacht mache
Denn gseesch die Fratze nur no lache
Drey Daag Waansinn – jä das gitz
Mir mache mit – mit bitz Irr Witz

So scheen, so gschläggt, rundum perfäggt
Im Netzwärgg wirdsch vo Filter präggt
Jä wär lacht wirggligg, wär isch gschminggt?
Wär hett dr Joker? Isch er zinggt?
S isch alles scheen sowytt mr gseen
Doch jeede waiss: s isch schizofreen
E jeede Gloon hett sy Dämoon
Und jeede Plaan trybt ain in Waan
Die Wält – s isch klar – isch uss de Fuege
Jä kain wills gsee – doch alli luege
Sie schwinge Reede, iiberleege
Zum sich am Änd nid gross beweege
S isch Gift fir s Klyyma – spiirsch die Hitz?
Mir sitze uf em Schleydersitz!
Nur Hass und Laid statt Gaischtesblitz
Mir weeren ys – mit bitz Irr Witz

Wenn s Lääbe schlächti Karte git
Bewaar di Gsicht, beglaag di nit
E guets Blatt wäär dr erschti Schritt
Doch wichtig isch was machsch drmit
E jeede will dr Joker syy
Bi jeedem Spiilzug kasch voll dryy
Bisch narrefrey dangg Massgeraade
Du fraisch di und si hänn dr Schaade
Und wäärend die sich voll verstrigge
Lutt joomere und ummezigge
Will d Karte wider schreggligg ligge
Bisch du vor Lache am verschtigge
Die witzle nie me ab me Gloon!
Tja s Lääbe isch e Hueschtesoon
Und mängmol gits Zydroone-Schnitz
Die wäärde gsiesst – mit bitz Irr Witz

onYmats – Pfau zämme

Mir bruuche Hilf – ojeeminee!
Wär hett hitt unsre Pfau scho gsee?
Villicht isch är in greeschter Gfoor
Wo steggsch du denn, Dambuurmajoor?!

Jä Matsi-Patsi zaig do doch
Was trybsch? Wo steggsch? In weelem Loch?
Mir sorge ys, was isch passiert?
Hett d Lälli di am Änd entfiert?
Oder hett di d Mamme fremdblatziert?
Hesch ungeniert delifoniert
und bisch drbyy vors Dram spaziert?
Bisch bedupft? Was willsch erraiche?
Bitte gib e Läbenszaiche

Im Grund gnoo isch dr aitli Pfau
E scheen drapierti armi Sau
Mit kurzem Schnaabel, langem Schwanz
Doch nääbem Glanz bruuchts au Subschtanz
Jä insofärn isch är Exoot
Will är halt waiss, wos duure goot
Mir folge gärn däm Dambuurmeier
Däm schtolze Pfau mit Strasseneier
Doch wär duet jetzt die Märsch blagiere?
Und fiert die Clique stramm spaziere?

Jä d onYva ooni Mats isch fir uns neu
Doch anderscht als Änte sinn Pfaue nid treu
In Bärn hänn si Bääre, in Ziiri dr Leu
Und mir wäärde gveegled – werum liggt do Heu?

No immer wird dä Pfau vermisst
Jä hett dä sich villicht verpisst?
Das wär scho fyys, so richtig myys
Mir zaale Kopfgäld – Schnabelbryys
Jä kuum gits Stutz wird zwitschered
E Informant hett twittered
Är haig dä Goggel erscht grad gsee
Als neyschte Pfau im Comitée

Ganz haimligg hänn die ooni Sorge
Uns dä stolzi Pfau abgworbe
Hetts deene kaine gschildered?
Bi uns wird doch nid gwildered!
Dä Pfau stoot unter Arteschutz
Wies Phersonaal im Bruune Mutz

Mir finde das ganz unerheert
Dass me ys nimmt, was zu uns gheert
So Pfaue sinn schyyns so beliebt
Dass me sie haimligg transferiert

Statt ummegoggle, Räädli zaige
Muess är jetzt griesse, sich vernaige
E Kissli doo, e Handschlaag deert
Ob ihn das Warte au so steert?

Uns isch das glyych wie Pfaue-Schiss
Mir wisste do e Kompromiss
Är deerf im Comité go glänze
Und mir derfiir dr Cortège schwänze
Dr Stau bim Pfau blybt uns erspaart
Will d onYva hätt freyi Faart

Und wenns dr Pfau den wiider paggt
Will ooni Stägge isch er naggt
Si Hand zuggt scho nervees im Taggt
Denn deerf er zrugg, das isch e Faggt
So stoot das im Transfeer-Vertraag:
E Pfau bin Nacht, e Gnächt am Daag

Und immer wenns ums Gässle goot
Ischs scheen, dass är bi uns yystoot
Si Gschrey? Mr gniesses bis in d Nacht
Und wenn är denn no s Räädli macht
Denn isch dä Zolli butzt und gschläggt
onYva! Es basst pherfäggt

100 Joor Nelson Mandela – d Hoffnig schtirbt z letscht

Mandela, Madiba – mir bruuche di jetzt
In dinere Liga bisch immer no gsetzt
Will kaine nach dir doo die Lugge hett bsetzt
Und s Mode isch worde dass me wiider hetzt
Jä Freyhait und Vyylfalt sinn schyynbar nimm gschetzt
Statt Schtrytt ooni Waffe wird wiider verletzt
Exgyysi Herr Petrus, mir nämme ihn jetzt
Dr Himmel wird waarte, dr Nelson versetzt

Rassissmus, Krieg und Hungersnoot
E Lyyche-Bärg im Gummiboot
Wär schwarz isch schiesse d Bulle doot
Zem Gligg nid do, nid unser Broot
Dä Abfall wo no ummeschtoot
Das Sofa vo däm Bundesroot
Ob soo vyyl Laid gseesch numme root
Als ob jetzt d Wält grad untergoot

Jä halt, im Fall, s isch noonig z schpoot
Dä Knall bringt d Wält nid uss em Loot
Anschtatt voll Fruscht do z reklamiere
Leen mir ys lieber inschpiriere
Vo aim won ys no Hoffnig gitt
Und d Wält hett brägt mit jedem Schritt

Si Namme: Mandela, wo jeede do kennt
Will s Fyyr vo dr Freyhait dangg ihm e so brennt
Si Liecht isch vergliet aber nie ganz verlescht
Das Joor wär är hundert – mir fiire das Fescht

Gseesch d Wält nur bees, denn kennsch se schlächt
Dr Nelson macht die fremde Mächt
vom Find zem Frind fir d Menscherächt
Die Freyhait gitt de Mensche Rächt
Vyyl wichtiger als Heldegfächt
Isch Friide wo denn hebbd in ächt

E Drittel vom Lääbe verbringt är im Knascht
Si Zälle isch miggrigg, si Hirn e Palascht
Är hett no Visioone – nid Hass als Ballascht
Vo Friide und Glyychhait – är plaant ooni Rascht

Schwarz geege Wyss, si Land isch verrisse
Staat und Rassischte leen Mitgfiil vermisse
Fronte verhärte, si kämpfe verbisse
Syydafrika brennt, s isch alles verschisse
(Such a #Shithole country!)
Und wäärend s Regiim no mit Waffe regiert
Die wyssi Elite das Unrächt negiert
Sich Widerstand dittligg im Innre formiert
Waggst wältwytt Protäscht, wo s Land isoliert

E Land untr Drugg, will s fascht explodiert
Mandela, trotz Knascht, globaal exponiert
Es bruucht jetzt nimm vyyl zem ganz grosse Knall
Ai Fungge wurd länge – das isch nid dr Fall
Dr Nelson Mandela besänftigt dr Räscht
Mit wäägwyysende Wort und sanftem Protäscht

Si Land isch apaart, aber är ka s veraine
Nid schlächt, wurd y maine, näb ihm ka das kaine
E gwaltloose Kampf, das deent nid ganz bache
Doch s git Situazioone, do längt nur e Lache

So Lyt wien är die fääle hitt
Wo s usser Gschrey kuum Gschyyders gitt
Statt wyyse Wort und wysse Hoor
Sorgt d Gryyse-Fryyse jetzt fir Gfoor
Orangsch isch s Toupee und au d Hutt
Är fasst sich kurz, drfir au lutt
Damit dr letschti Duubel tscheggd
Jä stumpf isch trumpf – nid Intelleggd

Jetzt schtell dr vor, dr Nelson hätt
Em Trump si Hirn. Wär das nid nätt?
Är wär bis hitt no Untertaan
Regiert vom wysse Ku-Klux-Klaan

Dr Nelson zaigt fir d Eewigkait
Wie d Wält bewegsch mit Menschligkait
Wie Liebi iiber Hass ka siige
Und ooni Gwalt kasch iiberziige

Mr freyen ys ab deene Faarbe
Si iiberschmingge alti Naarbe
Wär d Wält uffdailt in schwarz und wyss
Hett nitt als Angscht – und immer Gschyss

Dr Mandela gitt, das ka me so saage
Bitz Hoffnig fir hitt, wo alli gärn klaage
Die Krieg und Konfliggt schleen ys uff dr Maage
E Madiba könnt d Wält jetz sehr guet vrdraage
E Maa mit Visioone, mit Deemuet schtatt Gyyr
Mir huldige ihm und traage sy Fyyr

Wenn är nur kennt do aabekoo
Zem mit ys fyyre – faarbefroo
Mit Muusig, Danz und braitem Lache
Mit hundert Joor no Fasnacht mache
Die Wält isch bees – mir pfyffe druff
Und schtregge s Glaas zem Himmel uff

Jä d Hoffnig schtiirbt z letscht, wien e flüchtige Kuss
Mir glaube an d Menschhait und s Guete am Schluss

Radi-kaal

Mach Platz du Lump, du hesch kai Waal
Radyysli sinn mr – radikaal
Ganz root vor Wuet und hart wie Schtaal
Wenn d ys im Wääg bisch wirds fadaal
Fanaatisch sinn mir bis in d Geen
Muesch gaar nid maine s syyg extreem
Bis tief in d Wuurzle radikaal
Semantisch gsee isch das normaal

Radyysli kunnt vom Weertli «Radix»
Ladyynisch: Wurzle – das isch d Matrix
Das isch d Baasis, dass mir kaal sinn
Radi-kaal – dr blanggi Waansinn
Will wird die Wuurzle denn coupiert
Die Gnolle aifach so skalpiert
Me kennt au saage Kopf-kaschtriert
Denn isch si radi-kaali-siert
So nennt mes wiirgligg, das Beschnyyde
Radyysli lyyde – nid z benyyde

Dr Trump fluecht lut im wysse Hyysli
Dä Riebli-Kopf wär gärn Radyysli
Är schreyt: It’s great, y glaub y spinn!
Will mir no radikaaler sinn

E jeede will ins Rampeliecht
Und läggt sich d Lippe luschtvoll fiecht
Doch numme grad dr scheerfschte Zunge
Isch dr Uffdritt wiirgligg glunge
Vom Fascho bis zem Vegi-Fundi
Will jeede Gheer haa in dr Rundi
Au fir die dunggle ISIS-Bäärt
Het sich die Masche voll bewäärt

De wirsch nur gsee wenn d wunderscheen bisch
Oder wenns extreemscht extreem isch
Dr Räscht griegt nur e Schulterzugge
Fadaal – dr Ilp isch nur e Mugge
Und doch wänn vyyl dr Elifant syy
Jä lueg: e Fättnapf – hösch, y trump dryy
Und alli gaffe, zien dr Schwanz yy
Dr aint leggt Fyyr, dr Räscht hebt d Hand dryy
Verbrennti Äärde, Schutt und Schäärbe
Jä isch es nid bitz frie zem stäärbe?

E jeede suecht dr Knall-Effäggt
Genau das isch dr gross Defäggt
Es bruucht kai Schwarm wo Äärscher läggt
Mee stilli Dängger – s wär perfäggt
Will d Wält isch z oft e riise Bschiss
Mit so vyyl Bländer ooni Biss
Nur schwarz und wyss, es macht ys Schiss
Kai Platz fir Faarb und Kompromiss

Politisch suuber, scheen korräggt
Perfäggt au d Fryyse, fascht wie gschläggt
Kai Schreyhals, Psycho oder Kauz
Dr hittig Hitler het kai Schnauz

Si Geegestugg, nid minder gfeerlig
Isch lutt, cholerisch, au nid eerlig
Är hetzt, verletzt, verschetzt sich ständig
Mit Fake-News fillsch ganz schnäll e Sändig
So lauft das nämmlig, fuurchbaar trischt
Als skrupelloose Populischt
Wo Angscht und Hass zu Gift vermischt
Und gäärn au mol im Bruune fischt
Vyyl lätzi Faggte, ächte Hass
Wird s Volgg verhetzt ändet dr Spass

Egal wie lut und radikaal
Mir weeren-ys jetzt geg die Gwaal
Iir Dinnpfiff isch zwoor iiberaal
Doch mir sinn in dr Iiberzaal
Jä stumpf isch Drumpf gilt nimm ab jetzt
Kai Angscht, kai Hass, es wird nimm ghetzt
Hesch tscheggt? Machsch mit? Die Nuss isch knaggt
S Probleem wird an dr Wuurzle paggt
(Grab ’em by the Wuurzle)

Mach Platz du Lump, du hesch kai Waal
Mir schiesse zrugg – ganz radikaal
Pass uff was saisch sunscht kunnsch no draa
Und luegsch ys denn vo unde aa

Fort Europa

E Feschtig vo usse, vo inne en Insle
Die dinne dien singe, die dusse mien winsle
Die ainte hänn Party, die andere kalt
Si schteen vor dr Diire und gseen dur dr Spalt
Si luege sich aa, die ainte denn wägg
Wil d Maade im Spägg, die juggt das e Drägg
Sie nimmt no e Biss und zupft sich am Klaid
Es däät ere laid fir was si jetz said:

Verzell uns nytt vo Flichtlings-Kriise
Mr leehn ys d Party nid vermiise
Sunscht miesste mir jo s Hiirni bruuche
Das wurd ys ebbe scho bitz schluuche
Drumm schtegge mir halt kurzerhand
Ganz elegant dr Kopf in Sand
Uff dass die Kriise bald versandet
Und nid noo me Laid bin ys landet
Damit mr kenne sicher syy
Gits Kischtewach au uff em Ryy
Drzue – will hitt kasch kaim me traue
Dien mir jetz flyssig Muure baue
Berlin und Gaza, au Pjöngjang
So Müürli baue mir no lang!
Um ganz Europa, Schtai fir Schtai
In dääre Burg sinn mir dehai
Mr gniesse d Rueh im Aug vom Sturm
Und gheye Schwimmring ab em Turm
Damit die kenne wytter schwimme
Und nid die Muure dien erklimme
Will mir hänn doo en Obergränze
Und bruuche Ruum fir unsri Ränze
Dangg Tränegas und Schtacheldroot
Hänn mir no Platz im Partyboot
Drumm kemmed nid – mir schigge Hilf!
Sunscht lande dir und mir im Schilf
Dä Sturm ka jo nid eewig duure
Mir sinn so frey und schtärgge d Muure
Und schliesse Gränze, graabe Grääbe
Will mir do halt in Rueh wänn lääbe
Uff dass denn d Zyt die Wunde hailt
Und unsri Schuld bitz umverdailt

Es isch frappant, wie all die Fratze
So schaamlos hasse – ooni Glatze
Ganz grimmig isch im Volgg si Gsicht
Es bällt und zischt: mr mache dicht
Grad au im Netz – s isch kai Gedicht
Es bruucht nimm vyyl, das leehrt ys d Gschicht
Was du deert hesch lääse kenne
Do gseesch jo scho d Baragge brenne
Angscht und Hass und wenig Gribbs
Wo isch dr Dürr? Wo isch dr Lips?
Villicht beschwipst im Kinositz?
Jetz lached nid – das isch kai Witz!
S isch alles sicher, kai Probleem
Ischs nid rächt, ischs linggsextreem

Jä wär hett Angscht vom schwarze Bart?
Gäll, sachligg blyybe isch hitt hart?
Me ka so lyycht uff alles schimpfe
Mit Hass und Angscht die Gsellschaft impfe
Im Gaischt isch au Europa Flachland
Vom Härz zum Hirn – en Arm lang Abstand
Mit mee Courage im Menschemeer
Schreyt kain me nach dr Biirgerweer
Wenn mir die Kriise gschiid verdaue
Wurd niemer miesse Muure baue

G.N.U. – Gib nid uff

D Stadt isch ruhig, kai Windli waiht
Kai Sunnestraahl, kai Güggel kraiht
Dr Bode bebt und Schyybe zittre
Es donnered als wurds go gwittre
E dunkli Front am Himmelhoof
Verschreggt grad die verschupfte Schoof
Wo stuunend steehn am Stroosserand
Si gseehn si ko – e schwarzi Wand
Die walzt sich vorwärts, kunnt im Nu
Denn sinn si do, die wilde Gnu

Das Bild, dä Biss, die Poesyy
E woors Gedicht – so muess es syy!
So subversiv, mit Intelläggt
Subtil, debil und doch diräggt
Dä Zug, das Goschdyym, s passt perfäggt!
Dä Gaischtesblitz verdient Reschpäggt.

Nur aini isch ganz durenand
Drbyy kunnt die nid mol vom Land
So stooht döört ganz verdattered
Mit me Gebiss wo glappered
D Frau Sarasin am Stroosserand
Voll Zwyyfel iiber iir Verstand:
Die onYva, s isch unerheert
Wie die jetzt do dr Cortège steert!
Es glepft, es raucht, s isch ai Radau
E Härde Gnu, e bitzli blau
Jä Sinn das Schlimpf, y gseehs nid gnau?
Do druss wird wiirgglig kaine schlau
Dä Kaktus döört git au kai Sinn
Är drummled wild – y glaub y spinn
Als ob das noonig gniegend wär
Pfyfft vorne draa e Legionär
Und zwischeninn, s isch wie im Waan
E Meerjumpfere – filigran
Fascht wien e Hirt wirft die dr Stogg
Und danzt in iirem Schuppe-Rogg

Do hauts aim fascht dr Nuggi uuse
Dr Sarasin blybt nur no s Gruuse
Si schimpft und speyt grad Gift und Galle
Will kain das Sujet doo ka schnalle
Drum will si jetzt e Zeedel kralle
Dr Vortrab wird grad iiberfalle
E Schrey, e Schlag, denn gheert mes knalle
Si zaigt dr Zeedel, foot aa lalle
Doch kain verstoots, die Wort verhalle
Will iir Gebiff isch uusegfalle

Grad nääbe dere alte Grytte
Foot s Bublikum jetzt aa mit strytte
Die Gnu sinn doch, sait aine hässig
Als Sujet huere chaibe gschpässig
Die Glygge, s gooht mr geg dr Strich
Will, dass ych mir dr Kopf zerbrich
Die stiirme tobend um dr Egge
Und maine, dass mir das denn tschegge
Gib Bier statt Gnu! Nid iiberlegge!
Die Viicher solle grad verregge!

Ganz anderscht gseeht das s Annegreet
Wo straahlt wien e scheen Bluemebeet:
Dä Schlumpf, die Gnu, dä Legionär
Das Zämmeschpiil isch legendär!

Doch was die Lytt jetzt noonig wisse
Si wärde laider grad bitz bschisse
Fiir alli, wo dr Sinn vermisse
Dien mir jetzt mol dä Helge hisse:
«G.N.U.» stooht do fir «Gib nid uff»
Au nid im allergreeschte Buff
Dr Zuesatz, wo eych woohl nid gfallt:
«Es het e jede schon e mol e Sujet nid gschnallt»
Das isch e sanfte Stich in d Sytte
Geg all die gschyyde Dängger-Glygge
Äxgyysi fir dä frächi Tritt
Mir wänn gar nid, dass es Sinn gitt!

Das isch dr Zipfel – vyyl Lärm um Hüt

Hösch, Bebbi, y hoff y bi nid vorlutt
Sag doch rasch: Wie heschs mit diner Vorhutt?
Isch alles no draa deert an diner Zipfelkappe?
Oder hesch en miesse abgää, dä winzig Lappe?
Jä wäge däm Ding grad näbe dinem Seggel
Gänn sich neyerdings stuuri Grind uf e Deggel
Juude und Moslem geg Aawält und Ärzt
En uuralte Bruuch wo ainigi schmärzt

Schnibb-schnabb Vorhutt ab, scho gseen alli rot
Biebli ans Riebli ooni jedi Not?!
Richter in Köln sage, dass das nid goot
Juude und Moslem wänn dass mr sy loot
Es sig halt e Bruuchtum, das Schnipple am Zipfel
Drum nämme sie s cool – andri finde s dr Gipfel
Die Glaine die miesste halt unverseert blyybe
Bis sie son e Yygriff elai unterschryybe
Und wär wiiderspricht, jä dä wurd untertryybe
Wär Biebli verletzi dä haigi e Schyybe
Sie maane: Bi Binggis verstosst das geg s Grundrächt
Die andere glaage und saage s sig ungrächt
Und nenne drbyy iiri Freyhait vom Glaube
Und iiri Kultur wo me so wurdi raube
Die kenni mr nid e so aifach beschnyyde
Das miesst me vermyyde wil d Biebli nid lyyde
E Schnittli in Eere, e Zipfel fir Gott
Was d Gschicht ys kennt leere, das ka kai Verbott
So strytte sy flyssig um s Wool vo de Glaine
Die Froog bewegt d Wält, jä das kennt me fascht maine
Vyyl scheener isch doch, näbe jeedere Mainig
Juude und Moslem sinn sich emol ainig!

Im Kaffi vom Heidi gits haissi Debatte
Die ainti will ganz klar e Kappe fir d Latte
Jä nid so bim Vrony, die will unten ooni
Das sigi en Yygriff wo sich fir sy looni
Dr Walti vom Stammtisch grad näbe däm Gränzli
Hett mitgloost und dänggt sich: das wärs doch firs Schwänzli!
Är seggled zem Doggter und sait em denn ghetzt
Y will unters s Mässer – mach «Free Willy» jetzt!

Dr Limmel liggt schlaff und entschpannt uf em Schraage
E Lampe wo bländet, e fuuls Gfyyl im Maage
Mit naggige Lände – kenntsch aagnäämer warte
E Schweschter wo läched, mr wurdi grad starte
Denn Dupfer, Skalpell – jä s isch langsam Zyt
Aber dr Doggter sig noonig so wyt
Är stoot numme do und zittered blaich
Dr Walti, nervöös, dänggt: mach mr kai Saich!
Son e Joomeri sell mi Zipfel rasiere?
Drbyy kennt deert unde jo so vyyl passiere!
Dr Doggter sait duuch, und hiilt drbyy fascht
Das Uurdail us Köln sig fir iin Balascht
So dass är kai Aichle me stutzt an däm Mascht
Är wurdi jo gärn – aber will nid in Knascht
Dr Walti liggt do und ka numme lache
Und dänggt: hätt-y doch das als Kind scho lo mache

Kämbbschau? – Goots der Wirtschaft schlächt,
ischs Kämbbe uffsmool rächt!

Agil, mobil und voll vernetzt
E Zält wird hitte immer gschätzt
Erscht rächt grad jetz zer Wirtschaftsgryyse
Leehn mir ys d Feerie nid vermyyse
Ganz quietschfydeel in Adilette
Mien mir jo nid uf Bali jette
E Bett mit Meerbligg wär zwor heerligg
E Krytzfahrt isch ys aber z gfeerlig
Mir feschte, singe, suffe, tanze
Mit Basler Sunne uff em Ranze

Arbetsloos – mir hänn kai Zaschter
Aber Zyt und ganz vyyl Laschter
Statt Loohn griegsch hitt nur uf dr Deggel
Die Gryyse gooht ys uf dr Seggel
Mir mache blau und geehn go kämbbe
Und bsetze Freyriim – das gitt Lämbbe
Ooni dass mer uns geniere
Dien mir Pärggli okküpiere
Au wenn mir d Schugger so düpiere
Die mache nyt – nur observiere

Jä s Kämbbing-Läbe isch e Spass
Das findet au dr HP Gass
Und reserviert – zem sicher syy
E Räntner-Zält mit Bligg zum Rhy
Är kunnt grad rächt – s isch ebbis frey
E Luxus-Zält – dr letschti Schrey
Mit Harem, Diener, Schnaps und Kaffi
Es schmeggt halt no bitz nach Ghadaffi

Y fahr in d Feerie an d Rhyviera
Mit Fäähri-Feeling cada sera
Jede Oobe ooben ooni
Ooni Boni, goppeloni
Mit Budget-Bier und Billig-Wyy
E Grill am Rhy ka chillig syy
Die riise Wiirscht – das isch nid glooge
Hänn mir im Dytsche yynezoge
Sag liggt dir s Flaisch au schwäär im Maage?
Es gitt en Usswääg – muesch nid glaage
Du liggsch an Boode, flach wie Rase
Und deggsch dy zue, grad bis zer Nase
Denn spiggsch e sone blaui Pille
Scho stooht das Zält – um Himmels Wille

In Uusgang gooht dr Maa vo Wält
Zer Sicherhait mit Party-Zält
In Taxis, Hotel kasch nimm penne
Dy Velo gstoole, z fuul zem renne
Und s Drämmli kasch – ojemineh
Zu spooter Stund au nimmy neh
Nur Lischtling, Limmel, Mässerstächer
Und Priigel-Räntner, Schwärverbrächer
Do liggsch doch lieber nach em Feschte
Diräggt ins Zält mit digger Weschte
So kuschelwaich und kuugelsicher
Schaffsch Nacht fir Nacht wie Stroossestricher
Äggschen-Feerie, grad am Rhyy
Occupy – mir sinn drbyy

Als Kämbber kasch no richtig träume
Vo Frischluft-Feerie – irgendneume
So völlig frey und ooni Ghetz
Kai Händy, Läptop und kai Netz
In Duggige und wytter hinde
Deert kan aim nid mol Google finde
Ganz wytt ewägg vom Daate-Waahn
Gilt Aug um Aug und Zaahn um Zaahn
E Lääbe wie zu Gotthälfs Zytte
Ganz ooni feschi Facebook-Sytte
Do gits kai Strom und fliessend Wasser
Jä s Baselbiet spaart als wie krasser
Mir pfyffe druff und geehn go zälte
So Gläägehaite gits vyyl z sälte

Eeländ – mir verregge

Ganz schwarz mi Mantel, schwarz mi Seel
Bi voller Graft e glai Juweel
Dangg mir isch d Wiirtschaft quiitschfideel
Jä do druss macht hitt kain e Heel
Drum nenne si mi schwarzes Gold
Will wär mi bsitzt, däm syg s Gligg hold
Dr aint hett Fraid am volle Tangg
Dr ander wird drvo nur grangg
Doch hesch vyyl Eel-Gäld uf dr Bangg
Empfindsch mi Abgaas nimm als Gschtangg

Y sags drum gärn: bi schwarz und stolz
E Graftstoff wie us Ebeholz
E jeede bruucht mi fir si Daag
Drum sueches mi an jeeder Laag
Au dief im Meer gseen ych se boore
Drbyy hänn die do nyt verloore
Kai Wunder kunnts zem Super-Gau
Jä Gyyr macht blind und oft nid schlau
Wenn alli sich um Roohstoff strytte
Denn zaigt sich mini dunggli Sytte

E schwarze Glumbbe liggt im Sand
Halb uffrächt, doch mit schweerem Stand
Drvor e Kunschtfrind, hoch im Rang
Wo maint, är macht dr grossi Fang
Ooh lueg, wie scheen! Das Wärgg, do wett y
S isch sicher ains vom Giacometti
So schwarz und schwäär, erstarrt im Meer
Doch wart, es läbbt! Si Bligg isch leer
Dä dunggli Flägg umgää vo Dunscht
Isch dämfall doch kai Freyluftkunscht
Es isch e Vogel, voll vrgläbbt
Wo mee scho doot isch, als er läbt
Är grächzt und grääit und griecht voraa
Obwohl ihm kain me hälfe ka
Y sag ganz duuch, es däät mr laid
Wäg däm sym scheene Fääderglaid

Jä so vyyl Eel verdrait nur aine
Dr glatti Hakin, wurd y maine
Wär är am Strand mit sine Hoor
Denn gäbts fir d Tierli do kai Gfoor
Will siini Strääne absorbiere
Was anderi im Meer verliere

E Schelm wär dänggt, dass die wo s Eel hänn
All das Eeländ soo nid gsee wänn
Doch iiri Finger blyybe eelig
Es lauft wie gschmiirt, das Gschäft macht seelig
Ihr Job isch nid im Gwisse z boore
Drum ischs egal, goot bitz verloore
Doch aines Daages goot ne s Eel z änd
Denn daile mir is wiider s Eeländ
Mir hänn si ussprässt wien e Druube
Jetz ka me nimmi änger schruube
In allne Pipelines schteen d Turbine
Und d Wält gseet uss wien e Rosine